Willem Poprok - Derick van der Walt

wanneer jou lewe jou rollercoaster is

Partymaal draai die lewe anders uit as wat jy dit in jou wildste drome voorgestel het. Vir Willem van Vuuren is die hoërskool eerder ‘n nagmerrierit as die avontuur waarop hy gehoop het. Want almal eis hulle pond vleis van hom. Daar is die vreemde kinders in die kunsklas waarin hy per ongeluk beland, die rugbyspan waarin hy ter wille van sy pa se Twickenham-knie moet vasbyt, en die simpel kompetisie waarvoor sy broers hulle pa wil inskryf. Hallo. Hulle pa.

Dan is daar nog Alesea wat dink dis baie uncool om ‘n Blou Bul-rugbyhempie te dra (al is dit om jou pa se slaghuis te bemark) en sy oupa en oom Fred in die ouetehuis, wat wonder waar kry ‘n mens stout goedjies op die internet.

Dalk is juffrou Blom reg: Partymaal moet jy jou eie kop volg. En sy behoort te weet, want sy kan ‘n rugbybal skop dat dit klein word.

Willem Poprok is die humoristiese vertelling van ‘n seun wat sy stem in ‘n groot gesin, en sy voete in ‘n deurmekaar wêreld, moet vind.