Waar die reënboog buig - C.F. Beyers Boshoff

’n Swartkop-meisie met groot oë en ’n nog groter droom het geweet dat sy eendag ’n skilder van naam wil wees, maar die afstand tussen werklikheid en droom is so groot en wyd  soos die span van die reënboog. 

En toe kom tant Joyce in die agtienjarige Truida se lewe. "Hartjie, as jy sukses wil behaal, gryp elke moontlike geleentheid aan die hare en moenie laat los nie." Daardie maltrap-tante van Truida het geweet waarvan sy praat, want haar hele lewe lank het sy bloots op die rug van sukses gery en geweet hoe om die lastige dinge van die werklikheid te systap. Sy het ook reeds twee mans begrawe - twee liewe mansmense wat haar ryk nagelaat het. 

Alles wat Joyce aanpak, slaag so op ’n verkeerde manier, en nadat sy vir Truida ongevraag belowe het dat sy haar oornag ’n bekende skilder sal maak, het dinge begin gebeur - sukses, verliefdheid... maar ook die onverwagse, want die spreekwoordelike pot goud by die punt van die reënboog was nie werklik daar nie. 

Waar die reënboog buig is ’n verhaal in die ligte trant, ’n verhaal wat op die tong bruis en wat jou jammer laat voel omdat die slot nader kom.