Tussen kokerboom en kaiingklip - Pieter Strauss (First edition)

Pieter Strauss is ’n boorling van Kenhardt, ’n dorpie in die hart van die Boesmanland waar sy familie reeds geslagte lank woon. Hierdie nuwe bundel verhale volg die gewilde Fluitwiel! Ware lag- en liegstories uit my dóúriewêreld op met nóg ’n groter verskeidenheid temas en karakters uit sy hartland, vertel in die Boesmanlandse taal wat so plesierig in mense se ore kom lê.

Dis heerlike verhale oor gewone mense se pogings om ’n bestaan te maak in hierdie ongenaakbare deel van die wêreld, aangebied met humor en deernis. "Mense met drome. Mense met ideale. Mense wat, soos die binnedorpers, vorentoe wil mik in die lewe... Al ry die ongeluk die bultbewoners maar meestal bloots," soos Fires van Vuuren se ouma gesê het.

Daar is byvoorbeeld tant Meraai, "’n mollige ou dame met haar hare stewig in ’n grys bolla agter haar kop vasgebind, die uitwaartse golwing van haar gesette lyf daglank ingeperk tot die lapgrense van die blommetuin op haar voorskoot..." Dan is daar oom Kieriekop Kotzé met net ’n bietjie hare op sy té klein koppie, en Hermias Volgraaff, wat elke Boesmanlander, lewendig en veral die dooies, by die naam ken. 

Tussen kokerboom en kaiingklip is ’n waardige toevoeging tot die Afrikaanse kontreiverhaalskat.