Tussen die waboomrante - Annemarie J. Pieterse (First edition)

Die Heivelders is mense wat nêrens anders sal aard nie as tussen hulle wabome, hulle besemriet en hulle sandpaadjies. Want die Heiveld is hulle wêreld. Dáár spoel hulle vandag agter hierdie rant in en môre weer agter daardie een.

Die wat egter lank op een plek vasspoel, raak so half toegewaai in verstarring. Soos Lui Liesa in haar kinderloosheid. Dáarby ook nog met ’n doofstom man. Of soos oom Herklaas Gonsie in sy uitkykpôs agter die klimopranke van sy stoep.

In hierdie bundel sketse word die Clanwilliamse wêreld op unieke wyse in herinnering geroep. Op sonderlinge wyse vang die skrywer die omgewing en sy mense met hulle kleindorpse leefwyse vir die leser vas.

Plek vir dramatiese gebeure en geweldige intrige is hier nie, maar dit is juis die eenvoud van die vertelling wat die tragiek en patos van hierdie “onherkendes” so aangrypend maak. Die verteller kyk en verken met deernis en deurgans is daar ’n humoristiese toon wat dié sketse aangename leesstof maak.