Trompie - Topsy Smith

Omtrent 30 kilometer van Johannesburg af, aan die voet van ’n berg, lê die dorpie Kwaggaberg. Mense op pad Gauteng toe jaag vinnig hier deur en dink dit is ’n mooi plekkie, maar darem te afgeleë. Min weet hulle!

As ou inwoners hoor hoe reisigers wat soms in die hotel oornag, smalend praat van Kwaggaberg wat so stil en dood is, skud hulle net kop, kyk veelseggend na mekaar en sê met ’n sug: "Hulle weet nie van Trompie nie..."

Trompie, sproetgesig en Grootkaptein van die Boksombende, is terug! Saam met Rooie, Blikkies en klein Dawie, neem hulle Kwaggaberg behoorlik op horings. As hulle nie ’n bobbejaan uit Dominee se tuin gaps nie, klits Trompie alles wat voorkom met sy kettie. Sy arme suster, Anna, loop deur wanneer die Boksombende besluit om vir haar ’n kêrel te kry. En Trompie se vasberadenheid om die tier in hul skool se toneelstuk te speel, veroorsaak omtrent konsternasie! ’n Steekhaarbrak, Boesman, kruip diep in Trompie se hart. Die groot probleem is dat hy alreeds ’n eienaar het...