Titaan - Karel Schoeman (First edition)

Tot laat in die nag bly hy besig met sy sketse, aantekeninge en boeke, alleen in die slapende huis waar hy woon, in die slapende stad, self reeds half aan die slaap met die kers byna uitgebrand. Hier staan hy voor iets meer as net maar ’n beeld wat op ’n kardinaal se graf of voor ’n openbare gebou geplaas moet word, besef hy algaande... Dit is ’n hele nuwe wêreld waarin hy deur middel van hierdie opdrag geloods is, soos ’n seewaarder op ’n vreemde en donker oseaan, duiselend voor die afgrond wat hy moontlik aan die rand van die verkennende gebied voor hom sal vind.

TITAAN is ’n biografiese roman oor ’n groot figuur in die Europese kultuurgeskiedenis, die skilder, beeldhouer en argitek Michelangelo Buonarroti, skepper onder andere van die beelde van Dawid en Moses, die Pièta, die muur- en plafonskilderinge in die Sixtynse Kapel en die koepel van die Pieterskerk in Rome.

Op impressionistiese en oorsigtelike wyse beskryf Schoeman die lewe, denke en werk van ’n groot kunstenaar, teen die agtergrond van die stede Florence en Rome, brandpunte van die Italiaanse Renaissance, in ’n tyd van kerklike agteruitgang en politieke geweld, wat egter gepaardgegaan het met ongekende geestelike en materiële opbloei.