Tien blou krale en drie lemoene - Hannie Maritz

Niks gaan ooit verby nie - so het Pa-Kotie vir Hannie gesê toe hulle op ’n dag weer een van haar en Lenie en Sussa se geliefde speelplekke op Nauhoho opsoek: ’n swemkuil waar ’n hamerkopnes lank gelede op ’n blink wit rots teen ’n wildevy geleun het. Al sien ons dit nie meer nie, het Pa-Kotie vir Hannie getroos, die nes sal altyd daar staan, die wyfie in die nes en jou hamerkop in die boom - en drie dogtertjies wat daar speel.

Met Tien blou krale en drie lemoene word Pa-Kotie se woorde waar: Die leser raak intens betrokke by die karakters in Hannie Maritz se vertellings oor haar kinderjare op Nauhoho, in die destydse Suid-Rhodesië. ’n Wêreld vol son en bruisende water wat oor dwalas stroom; ’n eenvoudige, eerlike bestaan in harmonie met die natuur; ouwêreldse waardes en humor; spontane, vreugdevolle kinderspel waardeur selfs die wonde van die doodsengel geheel is. Die mense in die Nauhoho-verhale sal voortleef in die hart van elke leser - kind én grootmens. Dis by uitstek ’n boek om sáám te lees en te geniet in ’n gesin.