Thomas@moord.net - Carina Diedericks-Hugo

Gggrrrrr... gggrrrrr... gggrrrrr... gggrrrrr... gggrrrrr... gggrrrrr...

Thomas staan op. Dit klink soos.... sy drukker! Hy stap na die drukker toe. Flippit! Sy drukker is besig om die een papier van die ander uit te spoeg. Dis mos onmoontlik - die drukker kan nie druk as die rekenaar afgeskakel is nie!

Hy buk om een van die papiere op te tel wat op die grond lê. Sy hand bewe liggies. Op die bladsy staan in groot hoofletters: YOU ARE NOT SAFE. Asof ’n slang hom gepik het, gooi hy die papier neer. Hy beweeg sy muis woes heen en weer. Die rekenaar is beslis af!

Die drukker hou vir ’n oomblik op en hy staar na die papierbesaaide lessenaar. Hy stap versigtig agteruit, te bang om sy rug te draai. 

Gggrrrrr... gggrrrrr... gggrrrrr... gggrrrrr... gggrrrrr... gggrrrrr...

Die drukker is weer besig om te druk. Hy stap versigtig nader en lig een van die papiere uit die drukker se laaitjie: HE WILL COME AGAIN. Vir ’n oomblik kan hy nie beweeg nie. Alles om hom word donker en hy knip-knip sy oë. Hy voel hoe ’n yskoue hand om sy nek vasklem...