Suid-Afrika en die nuwe wêreldorde - Leopold Scholtz en Ingrid Scholtz (First edition)

Suid-Afrika is vandag weer 'n gewaardeerde lid van die internasionale gemeenskap. Die wêreld waarheen die land teruggekeer het, sien daar egter baie anders uit as dié waaruit hy in die jare sewentig en tagtig stelselmatig gedryf is. Reuse-omwentelinge op alle terreine het Suid-Afrika én die wêreld byna onherkenbaar verander.

In Suid-Afrika en die nuwe wêreldorde kyk die skrywers hoe die nuwe Suid-Afrika op die nuwe wêreldorde moet reageer. Die grondliggende faktore wat Suid-Afrika se posisie ten opsigte van Afrika en die res van die wêreld bepaal, word indringend ontleed ten einde buitelandse beleidsrigtings aan te dui. Die outeurs belig veral die maritieme uitdagings wat Suid-Afrika die hoof moet bied ten einde sy potensiaal as 'n seemoondheid te verwesenlik.

Suid-Afrika en die nuwe wêreldorde bied 'n verhelderende perspektief op Suid-Afrika se aangewese rol in internasionale aangeleenthede.