Rugdraai & stilbly - E.K.M. Dido (First edition)

Sy weet dat sy onder die vergrootglas gehou gaan word. Nie omdat Randall 10 jaar ouer as sy is nie, maar omdat sy uit Aloevale na Victoria Park toe trek. Omdat sy, ’n bankteller, met iemand gaan trou wat sy eie slaghuis het, en wie se familie se geld agter hulle name het. Maar dit alles pla haar nie. Sy en Randall het mekaar opreg lief. Hulle gaan saam ou bene kou. 

Wat die pragtige Bernadette Petroos nie geweet het nie, is dat die grootste geluk op aarde die keerkant kan wees van die diepste  ellende. En dat dit die uiterste inspanning van haar sou verg om haar gebroke self weer heel te kry. 

En Randall Fontaine? 

Nooit het hy kon droom dat dit moontlik was vir ’n mens om iemand so lief te hê soos wat hy haar het nie. En hy behoort te weet, want op dertig sit hy al met ’n rykdom ervaring. Meisies het hy baie gehad.

Maar Bernie is anders. Hy het sommer van die begin geweet hy wil daardie trots en regop lyfie vir altyd langs hom hê. Hy wil altyd in daardie slap bruin oë vaskyk. 

En tog, later sou Randall hom telkens moet afvra hoe hy ooit sy hand teen Bernie kon opgelig het.

In Rugdraai en stilbly, haar tweede roman, loop E.K.M. Dido die ongelyk huwelikspaadjie saam met twee karakters wat onverhoeds betrap word deur iets waarin selfs die mees liefhebbende paartjie hulle kan vasloop. Onbevooroordeeld, en met besondere begrip en deernis, skets Dido ’n situasie waarmee meer mense sal kan identifiseer as wat hulle graag teenoor hulleself sou erken.