Raka die roman - Koos Kombuis

die dag toe die ondier gekom het

was daar geen ruises of sosiale funksies in die Opperman-huishouding nie. Dominee Theunis Opperman was in sy studeerkamer, besig om te skryf aan sy preek vir die volgende dag. Mevrou Dominee Theunis Opperman was reeds in die dubbelbed, haar gesig vol room gesmeer, verdiep in Faye Kellerman se nuutste speurverhaal.

Hul oudste seun, Werner, was besig om om die blok te draf, geklee in sy Maties-sweetpak en tekkies. Onder in die kelder langs die tafeltennistafel was die jonger broer, Jacques, besig om dagga te rook saam met die bure se seun, terwyl die sussie, Melanie, sit en huiswerk doen en ongemerk oë maak vir die bure se seun. Die jongste Opperman-seun, Jozua, was alleen in sy kamer met die nuutste Loslyf.

die dag toe die ondier gekom het

was die weer matig, en daar was nog geen teken van die strawwe winter wat sou volg nie—óf van enige van die opspraakwekkende gebeure wat die Oppermans in die volgende weke en maande sou tref nie.