Ons gaan trou!: Voorbereiding vir ’n gelukkige huwelik - Koosie Delport (First edition)

Jy en jou verloofde staan op die punt om te trou: een van die mooiste gebeurtenisse in enige mens se lewe. 

Miskien is julle al besig om planne te maak en voorbereidings te tref vir alles wat op dié mooi dag - en daarna! - moet gebeur. Geniet dit. Dis dinge wat ’n mens altyd sal onthou.

’n Mens moet net nie meer tyd aan die reëlings vir die bevestiging en onthaal en die wittebrood bestee as aan die voorbereiding vir ’n sinvolle huweliksverhouding nie. Die hegte verhouding tussen ’n man en vrou kan baie mooi en ryk wees. Maar juis omdat julle twee in die huwelik so naby aan mekaar gaan lewe, stel dit hoë eise aan elkeen van julle. 

Daarom mag geen voornemende egpaar die huwelik onvoorbereid betree nie. Dit is juis waamee hierdie gids vir huweliksvoorbereiding julle wil help: om julleself deeglik voor te berei om van julle huwelik ’n gelukkige en ryk verhouding te maak.