’n Stringetjie blou krale - E.K.M. Dido

Dis eenvoudige klein krale. Gare wat eens op ’n tyd wit was en nou swart en smetterig lyk, is as rygstring gebruik. Iets kriewel in my gedagtes. Iets wat ek wil-wil onthou...

Nancy Karelse, dosent by ’n verpleegkollege, word geteister deur skrikwekkende nagmerries wat op hul beurt spanning veroorsaak tussen haar en haar man en kinders. Die hulp van sisi MaRhadebe, ’n wyse ou sangoma, word ingeroep. Om haar nek sien Nancy ’n stringetjie blou krale, en op ’n onverklaarbare manier weet sy dat dit ’n sleutel is tot haar kleinkinder-verlede - en die nagmerries.

In ’n verhaal vol drama én deernis herskep E.K.M. Dido hier die verlede van ’n vrou wat haar eie mense vergeet het en nou daarmee gekonfronteer word. Die kloof tussen twee wêrelde, en tussen twee kleurgroepe, word op unieke wyse blootgelê in hierdie verhaal van ’n dapper vrou wat worstel om te aanvaar en aanvaar te word.