’n Pawpaw vir my darling - Jeanne Goosen (First edition)

Mabel huil nou hardop by die kombuistafel. ‘Die jongste kom altyd laaste. Vir almal word daar gesóre, maar wat van my? Charlize Theron het die regte dinge gedoen. Geloop. Ek moes dit ook gedoen het.’

Soufie verloor haar humeur, ruk haar kopdoek af en gaan staan met haar hande in haar sye voor Mabel. ‘En nou kry jy end, Mabeline. Jy’t dit die beste van almal hier. Free board en lodging en jy maak nie eers jou eie bed op nie. Lady at large, ’n madam wat nie eers haar hande in koue water druk nie, laat staan nog ’n slag haar jas lig en uitgaan om ’n job te soek om haar ouers met ’n ietsie by te staan. Bederf, dis wat jy is …’

Mabel spring op, hardloop deur die huis en slaat haar kamerdeur so hard toe dat ek dag nou stort die hele nommer 24 se square boks inmekaar.

‘Jy moet jou staan en opruk!’ skree Soufie agterna. ‘A nee a! Nou sit ek my voet neer! Gun nie eers jou eie broer en suster ’n bietjie geluk in die lewe nie. Sies! Jy hoort jou te skaam! Wat van jy, jou ma? Wat van jou oumagrootjie wat sonder sonder ’n Grandpa of ’n knippie snuif in ’n sel sit en vergaan? Het jy al daaraan gedink? Toe, sê my!’