Miskien nooit - André P. Brink (First edition)

Die toevallige ontmoeting van ’n middeljarige skrywer en ’n jong meisie, en die kortstondige verhouding wat daaruit ontstaan, is die basiese gegewe van hierdie nuwe roman deur André P. Brink. Tog kry hierdie klein verhaal ’n onverwagte dimensie en diepte, want die skrywer gee ’n verhaal wat op twee vlakke voortgaan.

Terwyl die verteller in Miskien Nooit sy verhaal vertel, word voortdurend gespeel met ’n moontlike ander aanbiedingswyse, naamlik die film, en besin hy hom oor die moontlikhede van sy verhaal in daardie medium, sodat die twee vlakke mekaar wedersyds ondersteun en verryk in hierdie roman oor die kortstondigheid en betreklikheid van alle dinge.