Melk - Elsa Joubert (First edition)

Elsa Joubert het haar van die begin van haar skrywersloopbaan met Afrika besig gehou, en met Poppie Nongena, wêreldsukses behaal.

Hier is haar eerste kortverhaalbundel: indrukke versamel tydens baie Afrika-reise, wat oor byna ’n dekade heen gebroei het tot hierdie onthullende en onthutsende weergawes. In dié 10 verhale, elkeen onvergeetlik en uniek, word Afrika vir ons soos brood gebreek.

Hier is dit uitgesê soos nog selde - die geweld en die skoonheid  van Afrika soos ons hom nou leer ken. Hy praat hier met ’n stem wat niemand kan ontken nie - in Afrikaans.

Melk is aktualiteitsprosa van die hoogste rang. Dit dwing elke leser om sy staanplek en veronderstellings in verband met ons kontinent te herondersoek, en altyd in die innigste menslike terme.

Dit behoort tot die letterkundige werke van ons tyd waarvan ’ n mens met volle vertroue kan sê dat dit ver verby dié tyd sal bly leef.