Mattewis en Meraai: Die vroeë jare - Mikro

Rooisteenhuisies, peperbome, sand, warmte - dis Gonnakolk. Bedags wei hoenders en donkies in die hoofstraat; saans kom die melkbokke daarlangs huis toe. Hier maak jy jou hond nie vas nie en snags sluit jy nie jou deure nie. 

En op Gonnakolk het "die liefde mos mooitjies op ’n goeie dag sy intrek geneem."Die liefde tussen Mattewis en Meraai.

Meraai het voor Mattewis grootgeword. Lank, baie lank het sy hom op ’n afstand bewonder, snags alleen-alleen met hom in haar kamer "gesels". Hy met sy breë skouers, die hare op sy voorarms die kleur van nasomerheuning. ’n Netjiese man, maar swaar ter tale.

En sy? Sy met die twee lelike, puntige moesies op die gesig, kom rug en bakbene, maar tog darem vlytig en kunstig met die naaimasjien. Sou ’n man soos Mattewis haar ooit raaksien?

Hoe dit gekom het dat Maatjie Visser tóg oplaas die troumars vir hulle gespeel het, is maar een van die deerniswekkende verhale in hierdie bundel. Mikro het oorspronklik sy vertellinge oor Mattewis en Meraai se eerste huweliksjare saam met ander sketsnovelles oor vier bundels heen versprei. Nou is die verhale versamel en kan ’n mens sonder boek-neersit jou hart ophaal aan hulle lotgevalle.