Marthinus se roem - C.M. van den Heever

Marthinus Streber is ’n "strewer-" figuur en idealis wat matriek in die derde klas slaag. Op universiteit maak hy geen hond haar-af nie en uiteindelik beland hy as klerk in die koöperatiewe winkel op Koppiesburg. Hoewel Marthinus nie slim genoeg vir universiteit is nie, streef hy om hoër te styg in die lewe. Deur sy eie konkelary werk hy hom op tot bestuurder van die koöperatiewe winkel.

In Marthinus se Roem sien ons Marthinus Streber wat na bekendheid en roem streef. Hierdie sug na roem, wat ’n allesoorheersende obsessie is, lei daartoe dat hy voorsitter word van al wat komitee is en hy uiteindelik burgermeester van Koppiesburg word. Omdat dié strewe na roem geen perk ken nie, trou Marthinus met Dolores. Sy sal eendag ’n stewige erfporsie ontvang. Maar alles gaan nie altyd voor die wind met Marthinus nie...

In Marthinus se Roem gee die outeur die leser ’n geestig-satiriese beskrywing van ’n egoïs se holle roem. As idealis het Van den Heever ’n groot afkeer aan alles wat vals, hol en oneg is. Op speelse wyse vertel hy van Marthinus se opgang en ontnugtering en deurgaans hou hy hom aan die hekelende toon wat dié werk tot iets fris in Afrikaans maak.