Maasdorp se drie musketiers - Stella Blakemore (Maasdorpreeks #6)

Breggie Landsberg en Heloïse Malan, Maasdorp se twee woeligste en slordigste meisies, word gestraf omdat hulle ‘n „onvergeeflike” sonde gepleeg het: hulle moet vriende maak met Daniëla Lategan, die voorbeeldigste en netjiesste meisie in die skool. Die twee besluit egter om die sedige Daniëla vir goed ‘n les te leer, maar ongelukkig (en tot albei se verbasing!) kan Breggie se vindingryke brein nie gou genoeg aan ‘n plan dink nie. Hulle ontnugtering word groter toe hulle ontdek dat daar onder Daniëla se beskeie en onberispelike voorkoms ‘n duiweltjie skuil en dat sy geen gelyke het nie in die praksering van oorspronklike en verstommende streke.

Die drietal word boesemvriendinne en stig die orde van die Drie Musketiers. Die ganse Maasdorp word op horings geneem met hulle kreet:

Een vir Almal en Almal vir Een!

Dis nie net die Drie Musketiers wat hulle in ‘n groot verknorsing bevind nie; ook Kobie Malan, die liefling van almal, kom in die gedrang. Maar Maasdorp se Drie Musketiers sorg tog ten slotte dat die katastrofe nie noodlottige gevolge het nie.