Kwartet - M.E.R., Ina Rosseau, Elisabeth Eybers, Henriette Grové

Hierdie bundel bevat kortverhale deur vier van ons mees vooraanstaande skryfsters. M.E.R. se naam is reeds beroemd en bewonderaars van haar werk sal verheug voel dat die van haar beste verhale uit die lank onverkrygbare Onweershoogte in hierdie bundel herleef. M.E.R. het die keuse self gedoen en die verhale vir hierdie uitgawe hersien. Elisabeth Eybers en Ina Rosseau is eintlik as digteresse bekend en hul prosawerk sal ongetwyfeld veel belangstelling wek. Die debutant in boekvorm is Henriette Grové, wie se verhale reeds heelwat aandag getrek het waar dit in tydskrifte verskyn het. Haar werk openbaar ’n merkwaardige styl en vormbeheer en hou veel belofte in vir die toekoms. Die uitgawe van die werk van vier verskillende outeurs in ’n boek wat nie ’n bloemlesing is nie, is ’n nuwigheid in Afrikaans. Kwartet sal ongetwyfeld tot een van die vernaamste Afrikaanse prosa-publikasies gereken word, nie om die "interessante nuwigheid" daaraan nie, maar om die hoogstaande inhoud.