Keerkring van die hart - Ena Murray (First edition)

Kas Burger het vir Liesel Dempers liefgehad maar dit was ’n hopelose liefde want sy was Faan Dempers, sy werkgewer, se dogter en hy was maar net ’n ingeskrewe klerk in haar pa se prokureursfirma. En Liesel het op hom neergesien want hy was maar net ou Joop Burger se seun wat in die platdakhuisie in die onderdorp gewoon het. Sy was verlief op Rob Rabe, die bedorwe seun van die ryk Rabes.

Liesel se vriendin, Marlise, het op haar beurt vir Kas liefgehad maar Kas het gesê: „Daardie platdakhuisie is my huis. Nou weet jy.”

„Ja, nou weet ek jy is die snobseun van ’n dierbare ou man in ’n platdakhuisie,” het sy gesê.

En toe Liesel later na Kas se nuwe huis gaan kyk het, het sy gesê: „Is jy nou tevrede dat ou Joop se seun ook ordentlik kan lewe?”

Maar ou Joop het hartseer gesê: „Vandag skaam ou Joop hom vir sy seun. Die lap op die broek is weg maar die lap op die hart het gebly, en dis ’n lap wat jy self aangewerk het.”

So het ou Joop sy seun dié dag betig, wyse ou Joop wat gesê het: „’n Man is ’n man en ’n vrou is ’n vrou... en basta.”

Die ryke en die arme is altwee maar net mense en die enigste ware rykdom is die liefde. Dit is die boodskap van hierdie aangrypende verhaal van Ena Murray.