Hoopvol - Derick van der Walt

Ben word koud. Sy mond voel skielik droog.

Hy kyk na die foto teen die varsproduktemuur.

Sy blik is vasgehaak op die man heel regs op die foto. Hy vat versigtig met sy vinger aan die man se gesig. Hy het ’n pa.

Regte pa.

“Dink jy ons is te slapgat om iets weg van hierdie dorp af te waag?” vra Liefie terwyl sy haar lang, bruin bene in die sonlig uitstrek.

“Hoekom het ons nie ook verlede jaar na matriek op ‘n trein geklim en gaan kyk wat ons op die eerste die beste dorp anderkant Hoopvol gedoen kan kry nie?”

Nathalie kyk na die druiweprieël wat die dak van die hotel se binnehoftuin byna toegerank het.

“Dalk wou ons nie,” antwoord sy. “Miskien is dit bedoel dat party mense op sulke plekke soos Hoopvol moet lewe.”

Hoopvol is die aangrypende verhaal van Ben wat ná ‘n traumatiese gebeurtenis by sy huis in Johannesburg blindelings op ‘n trein klim om die pa te gaan soek wat hy nooit geken het nie. Dis ook die storie van Nathalie se uitsiglose lewe op ‘n dorpie in die Karoo. Op verrassende wyse word dié stories een.