Hanna - Rachelle Greeff

Hanna is ’n kleremaker, een wat eerder praat met mooi lappe as met woorde.

Mettertyd ontdek sy stilbly het ’n manier om mens van kop tot tone toe te spin. 

Albei haar kinders, Wim en Anja, swerf in die buiteland. Tog verbeel sy haar sy't geleer om ook hierdie allenigheid te besweer.

Wanneer Wim terugkeer na Suid-Afrika, berei Hanna met groot liefde ’n besondere feesmaal. Maar dié aand val haar lewe aan skerwe, en die letsels van hierdie gebeure lei haar op ’n eensame pad terug na haar verlede in: na haar oupagrootjie se afgesonderde vuurtorings aan die Kaapse kus, en haar kinderjare in die Karoo. Die na-trillings van ’n persoonlike trauma tydens die 1969-aardbewing ruk haar weer ’n keer tot stilstand, en sy trotseer oplaas die heimwee wat in haar hart woon sedert Ville, haar man, haar verlaat het.

Op ’n boeiende wyse verweef die bekroonde skrywer Rachelle Greeff die donker geheimenisse van een vrou se swye met die geskiedenis van ’n gekwelde land. Hanna is ’n verhaal van hoop en heling.