Griet skryf ’n sprokie - Marita van der Vyver

Wat bly oor, wonder sy bedruk, om die lewe die moeite werd te maak? Sigarette gee jou longkanker, dagga maak jou dom, koffie gee jou hartaanvalle, sjokolade maak jou vet, sonskyn gee jou velkanker, alkohol maak jou lewer klaar, geld gee jou slapelose nagte, grimering maak die feministe kwaad, swangerskap gee jou spatare, politiek maak jou moedeloos en seks gee jou Aids. Sy kan haar kinders seker nie kwalik neem dat hulle geweier het om gebore te word nie.

Mans pleeg selfmoord op die manier wat hulle kos maak - dramaties en morsig - Seker omdat hulle weet hulle hoef nie agterna skoon te maak nie. Daar sal altyd ’n vrou wees om dit te doen.

Ek het gedog George is ’n genie! ’n Filosofiedosent - how lucky can a girl get?... Toe vind ek uit hy wil nie ’n muse hê nie - hy wil ’n ma hê. Iemand om die gate in sy onderbroeke heel te maak. 

Die jongeling is nie so onskuldig soos hy lyk nie, het sy gedink terwyl sy tong oor haar haakskeen en sy hande oor haar bene gly, van haar enkels tot bo by haar dye en terug tot by haar enkels. Sy het gevoel soos ’n insek wat deur ’n engel gevang is, wriemelend op die vloer...

"Hoe kan jy skryf as jy nie die wêreld verstaan nie?" het George haar verwyt. 

"Hoe kan ek die wêreld verstaan as ek nie skryf nie?" was haar verweer.