Gangster - Carla van der Spuy (First edition)

“Ek was ‘n American. Ons doen alles wat mal is. Ek was ‘n rower. Ek was ‘n inbreker. Ek het gun geskiet. Ek het gesnuif — een neusgat en dan die ander neusgat. Jou brein soos kokende water. Dan moet jy weer gaan skarrel vir drugs.”

“Waarvoor maak ons ons kinders groot? Om vermoor te word? Almal in Hanover Park ken ‘n kind wat geskiet is. Die witness kruip weg, want die gangsters kom vir hom. Hy hol weg. Nou loop my kind se moordenaars vry.”

“Dit was ‘n lieflike aand. ‘n Saterdagaand. Mense het buite gesit. Ons dog eers dis klappers, . . . Toe’s hulle aan die skiet. Ek hardloop uit en sien my vriend se dogter lê in die pad. En ‘n vrou wat saam met my kerk toe gaan se seun lê daar.”

Bekroonde skrywer Carla van der Spuy gesels met geharde en gerehabiliteerde gangsters, ‘n lady gangster, ‘n ma wie se kind koelbloedig vermoor is, tronkbewaarders, polisibeamptes, en pastore wat probeer help. So hoor ons van die nommers, die Franse, die vierde kamp, Sabela en die Airforce (want hulle kan oor tronkmuur “vlieg”).

Gangster wys in mense se eie woorde hoekom gangs steeds groei, wat dit is wat kinders so jonk as twaalf na gangs lok, en hoe sommige tog daarin slaag om te ontsnap. Want mense se lewens kán omkeer, en Gangster is ook vol stories van hoop.