Die uurglas loop leeg - Ena Murray

Die aantreklike dokter Arnold Lutz met sy kenmerkende Don-Juan-glimlag, is die eerste man wat daarin slaag om deur suster Karien Saayman se professionele pantser te dring. Hy laat haar goed voel oor haarself, en sy geselskap bring ’n welkome verandering in haar saai hospitaalroetine. 

Is dit regtig so erg dat hy getroud is? Hulle is tog net vriende, en sy huwelik met Odelia was reeds op die rotse vóór die ongeluk waarin sy verlam is...

Só verseker Arnold vir Karien, en sy glo hom - tot die dag dat Hannes Eksteen, die welvarende boer van Franskraal, haar laat besef hóé gevaarlik haar vriendskap met die hartebreker-dokter is.

Karien gryp Hannes se huweliksaanbod met albei hande aan - desperaat om uit die benouende hospitaalomgewing te ontsnap. Dat sy Hannes nie met haar hele hart liefhet nie, beskou nóg sy as ’n onoorkomelike probleem. Waar vriendskap en respek is, kan liefde tog ook begin groei...

Maar ’n jaar later word hul verhouding aan die wreedste toets moontlik onderwerp toe Hannes in ’n fratsongeluk feitelik in twee gekloof word. Vir die eerste keer sedert haar troue kruis Karien se paadjie weer met dié van dr. Arnold Lutz, en dié keer weet sy hoe dit voel om in ’n verminkte huwelik vasgevang te wees, want al leef Hannes, sal hy nooit weer werklik man wees nie. 

Die uurglas loop leeg is ’n aangrypende roman waarin die liefde, en veral genade, triomfeer. Dit is met ’n deurleefde mensekennis dat Ena Murray dié verhaal - wat op die werklikheid gegrond is - aanbied, en een van die groot lewenswaarhede opnuut beklemtoon. Elkeen se porsie lewenstyd is sorgvuldig afgemeet, en die uurglas loop te vinnig leeg om die gawe van die lewe te vermors.