Die rebellie van Lafras Verwey - Chris Barnard

Die rebellie van Lafras Verwey verskyn in 1971 vir die eerste keer in boekvorm nadat dit die vorige jaar met die eerste prys bekroon is in ’n hoorspelkompetisie van die SAUK en die Belgiese Radio- en Televisiediens. In 1973 ontvang Chris Barnard die SAUK-prys vir die Afrikaanse hoorspele van die Suid-Afrikaanse Akademie vir Wetenskap en Kuns daarvoor.

In 1971 skryf Anna van Zyl: "Die hoorspel is besonder heg gestruktureer om boeiend gestalte te gee aan die tweeledigheid van illusie en werklikheid in die mens se lewe. Dit is ook ’n vingerwysing na ons moderne maatskappy soos blyk uit Lafras se afkeer van die werklikheid."

En André P. Brink: "In Die Rebellie van Lafras Verwey het ons ’n ontginning van die hóór-medium...wat oortuig, verras en beeldend en verbeeldend skep."