Die onverdeelde uur - Anna M. Louw

"Waarom sou daar nie deug daarin bestaan om die misverstand tussen hart en hart na baie jare weg te ruim nie, al is die tyd reeds lank verby wanneer dit ’n verskil kan maak aan die lewens van hulle tussen wie die misverstand was?" Sterftyd het aangebreek vir die trotse Giel van Rensburg op sy eensame plaas Nooitverlaat. En die drie wat in die skemeruur om sy bed gestaan het, sou die  ou man nou vir die eerste maal werklik leer ken. ’n Hele leeftyd het hom binne die perke van ’n paar uur in die sombere woonhuis afgespeel. En daarna sou die mense wie se lewens so innig met dié van Giel verweef was, nooit weer dieselfde wees nie: Jan, sy broer, wat tevrede was met ’n nietige hoekie in die lewe waar hy van verantwoordelikhede vry sou wees; Elmien, Jan se vrou, wat Giel se geheim altyd getrou sou bewaar; Collie, haar seun, vir wie die toekoms nog veel belofte ingehou het. Want hulle het geleer dat die verlede nooit volkome uitgewis kan word nie, dat dit altyd lewendig sal bly en die bronaar van die hede is.