Die moderne tuin - Hester Fourie (First edition)

Soos tye verander, verander mense se lewenspatroon en behoeftes. Ook die tuin lyk heeltemal anders as tien jaar gelede. Die tradisionele elemente van tuinbeplanning word steeds behou, maar word nou aangevul met interessante, praktiese idees.

Die uitleg is nie net minder gekompliseerd nie, maar instandhouding is ook makliker, want as die moderne tuin eers aangeplant is, sorg dit as't ware vir homself. Daar is baie redes vir hierdie praktiese benadering tot tuinmaak. Arbeid en water is skaarser en duurder, tuine is kleiner, en toenemende buitemuurse belangstellings eis dat die tuin nie ’n las moet wees nie, maar ’n plek waar ontspan kan word. Daarby word veiligheid al hoe belangriker, sodat tuine nie te ruig moet wees nie.

Die tuin moet dus baie versigtig beplan word. In Die Moderne Tuin verduidelik ’n bekende en ervare tuinontwerper hoe die tuinier te werk moet gaan om ’n veelkleurige tuin die hele jaar deur te verseker. Dekplante en plaveisel word ingespan om kaal kolle te bedek, struike lewer ’n permanente, kleurryke bydrae, loofplante sorg vir pragtige teksture en fatsoene, terwyl palms, keëldraers en broodbome interessante lyne en vorms toevoeg. Die Moderne Tuin bespreek voorbeelde van beddings en struikgroepe, lig dit toe met talle foto's en tekeninge, en bied uitgebreide keusegidse by die hoofstukke oor dekplante, struike, bome, keëldraers en palms wat besonderhede soos hoogte, groeiwyse, blomtyd, loof- en blomkleur verskaf.

Die Moderne Tuin se opwindende benadering tot tuinmaak is nou binne die bereik van elke tuinier wat ’n veelkleurige tuin verlang, en terselfdertyd tyd, moeite en geld wil spaar.