Die jaar toe my ma begin sing het - Engemi Ferreira

Hierdie eerstelingnovelle van Engemi Ferreira sal die lesers daarvan op 'n verskeidenheid maniere boei. Dit vertel 'n raaiselverhaal met 'n moeilik-voorspelbare ontknoping, fyn verberg in 'n netwerk van geheimsinnige gegewens wat deur verskillende spreekstemme, vanuit verskillende perspektiewe, aangebied word. Hierdie stemme bou egter ook, in besonderhede ná besonderhede, aan die beeld van 'n besonderse sterk karakter: "Ma". Dit is die stemme van haar kinders wat vertel van die ingrypende, lotsbepalende invloede wat sy op haar hele gesin uitgeoefen het. So word die novelle ook 'n klein gesinsgeskiedenis, waarin die waardes van lojaliteit wat deur familiewerwantskappe tot stand kom. Dit is 'n verhaal van buitengewone dinge: 'n sonderlinge gesin en 'n sonderlinge gebeurtenis—oorstof vir 'n goeie storie. Maar tog word algaande waarhede van waarde vir elke mens daarin aan die orde gestel. So word die boek dan ook deel van die "wysheidsliteratuur" of "wel-lewenskuns": deur elke kind se weergawes van die moeder se ligte lewenswysheid, haar essensieel religieuse belewenis van haar lot, haar dankbare vreugde aan die skoonheid, selfs in die bitterste ongeluk.

Om op kunstige wyse al hierdie sake saam te laat vloei in één stromende beweging, getuig van 'n onmiskenbare kreatiewe vermoë, en 'n beduidende belofte vir die toekoms.