Die geel kafee - Koos Kombuis

Koos Kombuis - die man met die bandana, die kitaar en die hartseerstem is ook die digter André Letoit.

Die geel kafee is sy tweede digbundel en is by die eerste druk beskou as ’n "Tagtiger-manifes" al het André Letoit intertyd ontken dat so ’n beweging in die letterkunde bestaan.

Toe hy vir die eerste keer "weer hierdie ou poems ... deurlees," skryf hy in sy voorwoord by die tweede druk, het twee dinge hom opgeval: hoe hy al hoe nader aan sy loopbaan as ’n liriekskrywer beweeg het en hoe Eurosentries die digbundel was. "Maar julle moet onthou: Met die publikasie van Die geel kafee was die nuwe Suid-Afrika nog net ’n pypdroom en die Europese tradisie - soos ook deur die Sestigers gebruik - was ons medium van protes." En, voeg hy by: ... "dalk, wie weet, dien dit as inspirasie vir jong digters en skrywers vandag."