Die eerste lewe van Colet - Etienne Leroux

Etienne Leroux is vandag ’n beroemde skrywer. In die literêre wêreld geniet hy internasionale aansien en wanneer daar ’n nuwe werk uit sy pen verskyn, is dit oombliklik groot nuus. Die eerste lewe van Colet was die eerste roman waarmee hy sy debuut in die harde wêreld van die letterkunde gemaak het. Maar reeds in hierdie vroeë werk het hy hom onderskei as ’n buitengewone knap skrywer, ’n kunstenaar wat die krag van sy suggestie ken en met ’n  besliste boodskap besiel is. 

"Hoekom dreun die see so?" vra Colet heel in die begin van hierdie roman aan die bruin vrou wat hom oppas. 

"Dis die gehuil van verlore siele," antwoord sy onder meer. En daar begin dit: die baie waaroms wat hom pynig en verwar en aftakel...totdat hy nie meer vra "hoekom" nie, net weet: ék is en die lewe is en dis alles ’n wildernis."

Leroux het nou al groot hoogtes bereik. Hy is bewus van die gebreke in sy vroeëre werk. Nogtans is dit boeiend om die eerste roman van hierdie fenominale skrywer te lees, want daarin vind mens die varsheid wat so kenmerkend is van goeie kunstenaars se eerste werke.