Dans makaber - Anna-Louize Heiberg (First edition)

"Jy wonder wie ek is?” vra die gasheer. "Goed, laat ek my bekend stel. Ek is ’n man met ’n idée fixe. Ek het iets om te sê, ’n dringende mededeling. Ja, ek lees dit in jou oë, maar jy het nie heeltemal gelyk nie. Wat ek aan jou wil meedeel, ís ’n fantastiese verhaal. Maar dit is nie ék wat dit meedeel nie; die dode self sal praat. Jy skrik weer? Vergewe my...

Ontspan maar. Dit is net ’n manuskrip. Jy sal dit lees, of ek sal dit vir jou lees. Miskien sal jy onwetend van my las op jou skouers neem.” By die flikkerende lig van ’n lamp word die manuskrip gelees – ’n verhaal deur ’n gestorwe vrou. En dan volg daar die beswering daarvan in vraag en antwoord...

Met die sirkelende ritme van ’n dans – die dans makaber – beweeg die verhaal met sy evokatiewe deurskruising van temas met toenemende intensiteit na ’n onafwendbare beslissing. Dans Makaber wortel diep in die kontemporêre religieuse denke. Hier word die mens gesien in sy konfrontasie met die eeue-oue probleem van die dood wat hom onvermydelik plaas voor die vraag na God en die moontlikheid van ’n ontmoeting met Hom. Dit is ’n verhaal wat met sy sterk, onmiddellike beelding en fyn geweefde struktuur die grondslae van die menslike bestaan binne die huidige lewensituasie blootlê en ontleed.