Brug van die esels - Dalene Matthee (First edition)

Sy skud die geld oop die bed uit. Dis pakke R20-note wat vasgemaak is met rekke. En die geld is nie gelukkig nie, want die rekke is te styf om hulle. Een vir een trek sy die rekke af en laat die note op die bed val en bly word. Loskom om asem te haal. Uit elke groot pak van tien pakkies van tien note elk wat met skuifspelde vasgemaak is. R2 000 uit elke pak. Veertig pakke. 

Dis die hele bed vol. Die hele kamer. Die hele gebou. Dis by die venster uit tot in die straat. Dis alles wat in die slapende winkels is, dis in die motors wat verbyry. Dis in die huise. In die mense se klere, in hulle kos, in hulle matte, stoele, tafels. In alles. Oor alles.

Daar's ’n krag in haar kamer wat sterker is as enigiets wat sy ken. Dit maak haar bang. Dit maak haar bly. Die geld op die bed is splinters van die magtigste mag op aarde; ’n mag wat bo haar verstand is. ’n Mag wat in oorvloed kan gee en sonder genade kan vat.