Bonga - Elsa Joubert

Bonga - is dit die verhaal van ’n jong man wat nie sy "plek" geken het nie en daarna moes sterf, en ’n hele gemeenskap saam met hom? 

Is dit die verhaal van Inacia Maria se liefde vir ’n man en vir ’n wêreld wat eintlik vreemd was aan haar, ’n liefde wat uiteindelik tot die vernietiging van daardie wêreld moes lei?

Is dit die verhaal van luitenant Vas d'Areujo - en alles waarvan hy die simbool is - wat homself in ’n fort verskans het en hulle wat "anders" was as hy, niks gegun het nie?

Kan Bonga gesien word as ’n skerp, skokkende aanklag teen ’n bepaalde opvatting van beskawing, wat die kiem van ondergang in hom dra? 

Allerlei elemente is hier aanwesig, saam met alles wat aan Elsa Joubert se werk ’n besondere plek in ons romanliteratuur gee. Dit is ’n verhaal waar elke klein gebeurtenis daar die flikkering is van wat onder die oppervlak lê, wat dieper gaan as net die feitelike en wat die diepste nisse van die mensegees belig.