Anton Rupert: ’n Lewensverhaal - Ebbe Dommisse met die samewerking van Willie Esterhuyse (First edition, 2nd print)

Die merkwaardige lewensverhaal van die Suid-Afrikaanse magnaat en weldoener dr. Anton Rupert word hier vir die eerste keer volledig en sonder doekies omdraai vertel. 

Dit is die verhaal van ’n seun uit die Karoo wat in die Depressie grootgeword het. Hy het nie, soos Harry Oppenheimer, ryk geërf of sy miljoene uit mynbou gemaak nie. Sy Rembrandt Groep was vervaardigers wat wêreldbekend geword het met handelsmerke soos Cartier, Dunhill, Rothmans and Montblanc. Binne enkele dekades is ’n familiedinastie opgebou wat die Ruperts, naas die Oppenheimers, die rykste familie in Afrika gemaak het. 

Maar Rupert is gedryf deur veel meer as die vergaar van rykdom. Lewenslank glo hy in deelgenootskap en saambestaan en leef dit uit; gevolglik bots hy telkens met die politieke leiers van die dag. Hy bevorder ook die kunste, kultuur- en natuurbewaring en begin oorgrensparke, ’n internasionale vernuwing wat vandag nog nuus maak.

Dié besielende boek, wat put uit die omvangryke navorsing en vele gesprekke met Rupert, sy familie en mense oor die hele wêreld wat hom goed ken, sal wye belangstelling wek.