Anderkant die stilte - André P. Brink (First edition)

As klein kindjie in Bremen het Hanna X al begin droom oor wat anderkant die stilte lê, waar die wind vandaan kom en palmbome wuif in die son. Haar kans om te ontvlug uit jare van mishandeling as weeskind en diensmeisie, kom wanneer die owerhede in Berlyn in die vroeë jare van die twintigste eeu begin om meisies te werf om in Duits-Suidwes-Afrika die manlike koloniste se behoefte aan vroue te verlig. As sy dit waag om haar te verset teen die attentses van ’n Duitse offisier op die trein tussen Swakopmund en Windhoek, word sy op onmenslike wyse gestraf en beland sy in ’n lugubere gebou diep in die woestyn. Dié plek is Frauenstein, “gevangenis, malhuis, bordel, armtehuis, dodehuis, uitwas van die hel; maar ook toevlugsoord, skuiling, laaste stasie”. Uit hierdie bestaan van lewende dood word sy geskok wanneer die enigste mens met wie sy enige aanraking het, die jong meisie Katja, bedreig word met verkragting. Dit is dan dat Hanna X in opstand kom om die volle mag en geweld van die Duitse Ryk aan te pak en daarmee haar en Katja se menswaardigheid en vroulikheid te bevestig. Hul apokaliptiese trek deur die woestyn word ook ’n reis deur die verborge streke van die gees en ’n openbaring van die dieper betekenis van lyding, wraak, vergifnis, medelye, liefde en lojaliteit.

Anderkant die stilte, die skrywer se twintigste roman in Afrikaans, is ’n meesleurende, ongewone verhaal. Dit verteenwoordig ’n radikale verskuiwing in André P. Brink se skryfwerk.