Abjater wat so lag - Wilma Stockenström (First edition)

“Miskien het ek met die dood getrou, kom dit by my op... maar nou raak ek sat vir hom. Hy bly my pal op besoek. Hy bring net woeligheid. Hy skryf vir my voor wanneer ek dit of dat mog doen en ek raak uitgeput van met hom saamleef want endkry is min. Ek en hy het al hoeveel baie mense vir die graf reggemaak. Ek en hy het vrugbaar saamgeleef, bitter baie jare nou al en nou moet hy ’n ander vrou soek.”

So peins die verteller in hierdie merkwaardige roman van Wilma Stockenström aan die einde van ’n lewe waarin sy, soos sy elders sê, “by die dood ingeboek” was. Met hierdie fenomenale kragtoer, ’n vertelling in die eerste persoon sonder enige dialoog of hoofstukke, waarin selfs die naam van die verteller nie vermeld word nie, bring Wilma Stockenström opnuut ’n vernuwing in haar werk en demonstreer sy weer eens hoe sy met elke roman ’n heeltemal nuwe rigting inslaan.

Abjater wat so lag is Wilma Stockenström se vyfde prosawerk en sal vanself sy plek inneem in die ry van belangrike Afrikaanse boeke.