100 - M.E.R. (First edition)

Wat kan ’n mens vir die wêreld om jou, vir die lewe, vir jou medemens beteken as jy ’n eeu tot jou beskikking het? Of miskien is tyd nie só belangrik nie.

Is ’n mens nie wat jy is en wie jy is ongeag die jare oor jou nie?

M.E. Rothmann het op mense, hoe lank of hoe kort hulle haar geken het, ’n onmiddellike en ’n onuitwisbare, dikwels vormende indruk gemaak.

Wie was sy, hóé was sy—hierdie vrou wat wel ’n eeu tot haar beskikking had, maar dikwels net ’n oomblik, één gesprek, één standpunt hoef te gee het om die wêreld vir haar medemens ’n bietjie anders, ’n bietjie beter te maak?

In hierdie bundel vertel twaalf mense uit hul herinneringe aan haar—en deur hul vertelling kom daar ’n beeld van ’n vrou na vore wat nie net vir diegene wat haar persoonlik ken, tot versterking is nie, maar ook vir almal wat deur die geskrewe woord met haar kennis maak.